之前香港政府在預算案承諾向俗稱「N無人士」津貼4000港元，但最近香港政府推出既「關愛共享計劃」，似乎有 D 弄巧反拙，不得民心。

By the way，何謂「N無人士」？

Wikipedia大約係咁寫既（https://zh.wikipedia.org/wiki/N%E7%84%A1%E4%BA%BA%E5%A3%AB）︰
「N無人士」多為收入低微的社會草根基層，由於不同原因而未能享用各種社會福利，當中包括政府對基層的援助，以及由公共機構在經濟環境不佳之時推出的為民抒困措施。

簡單直接咁說，「N無人士」就係乜野政府福利都「益」唔到佢！
一係冇車冇樓，就算有樓都只係用來自住的基層住屋而唔係豪宅；
一係冇得退稅，就算有都唔係退得好多稅；
唔係冇工做到要拎失業綜緩，亦唔係人工低到要拎低收入綜緩，但人工cover唔到開支，日日冇得溫飽但又餓唔死；
未老到退休夠期拎「生果金」，又唔係傷殘人士冇得拎傷殘津貼；

俾「N無人士」係咁嘈左好幾年，政府上年至話津貼4000港元，話下話下卒之到左今年至出到相關既政策，咁都未算，仲要連申請都好似要過幾關咁！

先講拎申請表，雖然「N無人士」可以去民政事務總署各區民政諮詢中心度拎申請表，但 D 中心都唔夠「貨」冇準備足夠既申請表俾人拎，「N無人士」平時冇受惠於福利已經慘，點知山長水遠兼分分鐘要請假去長時間排隊，諗住會有申請表拎但又得個「吉」，係「混吉」個「吉」，仲慘！

點知原來咁都未夠慘，民政事務總署各區民政諮詢中心仲要叫「N無人士」要拎表就自備白紙去佢地度等佢地幫手上網印申請表，要人地去搵間文具店去用廿幾蚊港紙買一疊一百張白紙，然後抽幾張出來去印申請表，其他果九十幾張白紙唔知做乜好，就算你想即場搵夠人團購一疊一百張白紙再每人分幾張咁分哂佢，都未必即是搵夠人啦，三唔識七鬼同你一齊團購白紙咩？

點知原來咁都未夠慘，政府諗住人地自己可以走去上網印，但政府有冇諗過，「N無人士」唔係人人家中都會有能力負擔到買電腦打印機，就算去圖書館度預約電腦去印都要同其他後生仔後生囡爭預約，仲要「N無人士」唔係人人識上網，咁你叫佢地點樣自己走去上網印呢？

咁你話，呢個4000元津貼對「N無人士」係幾咁「關愛」哩！

點知原來咁都仲未夠慘，填表也慘，果份申請表主要係要申請人填個人資料既，例如要寫︰
你叫乜名呀？
你住邊呀？你聯絡地址係乜呀？
你電話幾多號呀？
你身份證no.係乜呀？你幾時生日呀？
你戶口no.係乜同埋邊間銀行呀？
你乜野國籍呀？（唔一定要答）
你做「盛行」呀（你做乜野工架）？（唔一定要答）
剔格仔聲明你冇樓或只係有樓自住、退稅退唔夠4000蚊港紙。

大家就不禁會諗︰

其實我身份證no.係乜、生日係乜、叫乜名，呢D政府入境處一早有齊哂資料啦，點解唔去入境處拎資料呢！做乜要我特登填呢？

我戶口no.係乜同埋邊間銀行，仲有我地址係乜，呢D我影印張銀行月結單或銀行卡俾政府都見到啦！做乜要我特登填呢？仲有，你估奉旨人人都會有個人銀行戶口架，有D冇戶口有D又只有聯名戶口，若果冇個人銀行戶口果D就出支票俾，咁做乜唔統一咁全部出支票俾人呢？戶口資料都慳番唔使問啦！

既然我打乜野工同我係乜野國籍係唔一定要答，咁問來做乜，就算做統計，唔通我填「南非藉」又真係南非人咩？我填與唔填，政府係咪就可以「疊埋心水」唔同入境處拎個人資料對番國藉呢！如果唔係，咁我填來做乜呢？政府自己直接去入境處度check嘛！

剔格仔聲明果度又係，我點剔，政府係咪就可以「疊埋心水」唔同去稅局度拎資料對係咪退好少稅，政府係咪就可以「疊埋心水」唔同田土廳或其他相關部門度睇我有冇自住物業！如果唔係，咁我填來做乜呢？政府自己直接check嘛！仲有D選項既字眼點解唔到以寫直接D講重點呢？而家咁樣兜大圈咁寫你覺得低學歷既「N無人士」自己識剔到？到時咪又要搵社工幫手睇教佢地填，你電話熱線又打極唔通！

問我電話幾多號唔係唔ok，但政府D「關愛共享計劃」就長期「Jam線」唔慌搵到人啦，唔係諗住你打來我會隨時收到call呀，最後咪又係用我地址寄信去我度，問我拎電話來做乜呢？

成份申請表8樣有至少7樣就算唔使申請人填而政府都有方法可以搵到資料，咁搞咁大陣仗又咁混亂咁來要人拎呢份表、填呢份表，仲要就算填左表又怕貼郵票貼少左郵費寄唔到添（最近至話至少要貼3蚊郵票至寄到呀）……究竟係為乜呢？搞到花費左咁多人力物力，都仲未即刻津貼到人，仲差過之前上手「財爺」直接派錢（人地話哂都唔使花費咁多人力物力又唔使搞到人人勁麻煩咁填表完又仲要等）！

結果，成件事就係，為左政府「千呼萬喚始出來」俾「N無人士」果個好過乜渣都冇既4000港元津貼，「N無人士」就要山長水遠兼分分鐘要請假去長時間排隊等拎表，仲要未必拎到兼要為左有幾張白紙來俾政府部門幫你印表而要買一疊一百張白紙，然後仲要填一份可能俾唔少人覺得係「填來把撚」既申請表（因為政府有方法去拎相關資料而懶得去拎，搞到要要申請人自己拎表填完交上去），仲要等到4月申請期完左之後唔知等幾耐至正式批到呢4000港元津貼去申請人手度……咁你話，呢個4000元津貼對「N無人士」係幾咁「關愛」哩！

Anyway，香港政府剛剛話會改進一下︰

加印一百萬份中文版申請表格，分批送去派發點；增加24小時熱線由28條增加至34條；無須提交住址證明；郵資不足，寬鬆對待。

政府呢D臨時增加既措施係咪幫到手就仲未知，但今次政府俾人既感覺係，佢地似乎低估左香港既「N無人士」人口有幾多（預唔夠申請表派俾人）、低估左佢地既學歷（字眼兜哂大圈咁仲以為人人都會睇得明份表點填）同經濟負擔力（以為人人會好容易找到電腦同打印機用）！

更重要既係，政府俾人既感覺其實呢……政府係有幾了解民情同體恤民情呢？咁你話，呢個4000元津貼對「N無人士」係幾咁「關愛」哩！

讀者如喜歡這篇文章 ，可於文章最下方按下Likebutton以示鼓勵及支持（若LikeCoin用戶請先登入再按下Likebutton ，最多可按5下，而其他人士也可以了解LikeCoin及考慮是否註冊使用LikeCoin ）

而加入 LikeCoin 回饋創作者計劃，更有免費獲得coin的活動：

1. 註冊一個 LikeCoin ID (邀請人請填： tracy2018)
2. 確認已登入 LikeCoin (確認方法)
3. 點擊五下拍手(操作參考)
4. 完成後，你我都會獲得免費的 LikeCoin (可用來交換以太幣或現金)

# 香港 #社會 #生活 #化讚為賞 #化like為coin

由於《香港你、我、他》是圍繞香港的「低俗貼地」短篇單元故事，是發生在你、我、他身邊的日常，因此內容多為港式口語及粗言穢語，敬請留意。

我係順嫂，全家一齊住o係屯門舊式公共屋邨，不論係舊陣時定而家，屯門呢區俾我呢個十世都唔會點出市區既人來講感覺係好大，同埋好四通八達。

我覺得好四通八達，係因為衣、食、住、行都可以o係屯門呢區度解決。

先講「衣」︰

講到買衫，呢區真係行到你唔想行都仲得。

想要買有牌子既衫咩？可以坐輕鐵去屯門市中心同V City果一帶去行大型商場，順便行埋去後面舊式既商場 — — — 錦華花園商場。

唔介意無牌子只係買來「粗著」既衫咩？求其去區內任何一條屋邨入面的屋邨商場都有得你買，價錢質素豐儉由人。

再講「食」︰

講到飲飲食食，呢區除左食屎尿屁同食奇珍異獸之外，度度都有大把野食俾你揀，只係睇你肯唔肯搭輕鐵或港鐵巴士或用對腳去行下。

你要夠Grand咩？去屯門市中心同V City果帶D大商場一定大把唔同類型既食店過你揀。

你要夠貼地夠戶外、茶記或大排檔Feel咩？都有唔少選擇架，去三聖食海鮮又得、去蝴蝶灣BBQ又得、去友愛邨安定邨食新式同舊式大排檔又得……多野揀到你暈。

再講「住」︰

不論係租屋住定買屋住你都有唔少選擇，你可以因應你自己荷包既負擔去揀，你可以揀住新款豪宅、舊款豪宅、新式或舊式私人屋苑、新式或舊式居屋、公屋、村屋、割房等，乜都有，就算連工廠入面既割房都有得你揀，只係會唔方便同保安冇正常房屋咁好。

再講「行」︰

呢區交通真係好方便，你坐輕鐵或港鐵巴士就可以o係區內遊走超過八、九成既地方，區內離市中心較遠既地方如村屋都有小巴可以去到。你要搭車去BBQ又得、你要去行海灘又得、你要去市鎮公園行都得。

而如果你要出九龍或其他市區去玩呢？可以搭巴士或搭輕鐵/港鐵巴士再轉西鐵。

而如果你要去澳門玩呢？可以去屯門碼頭搭船。

而如果你要去內地呢？可以去坐B字頭巴士去深圳灣。

如果你問我屯門呢度有乜唔好唔方便既地方呢？我覺得除左多左好多自由行搞到屯門市中心果一帶同埋附近市鎮公園果一帶一年365日都多左勁多又拖行李箱、又冇乜禮貌既人塞住商場同埋塞住條路同埋開哂大聲喇叭唱歌跳舞係咁嘈之外，都冇乜唔好唔方便既，反正我都好少出去果頭行街買野就算去果度附近既新墟買”食送”都唔算多人到迫死行唔到，咪暫時由得佢地先囉；總之「佢地不犯我、我就不犯佢地」，香港人就係咁架啦。

讀者如喜歡這篇文章 ，可於文章最下方按下Likebutton以示鼓勵及支持（若LikeCoin用戶請先登入再按下Likebutton ，最多可按5下，而其他人士也可以了解LikeCoin及考慮是否註冊使用LikeCoin ）

而加入 LikeCoin 回饋創作者計劃，更有免費獲得coin的活動：

1. 註冊一個 LikeCoin ID (邀請人請填： tracy2018)
2. 確認已登入 LikeCoin (確認方法)
3. 點擊五下拍手(操作參考)
4. 完成後，你我都會獲得免費的 LikeCoin (可用來交換以太幣或現金)

讀者在看完這篇文章以後，若有興趣也可以閱讀其他相關的分享文章︰

#香港 #社會 #生活 #化讚為賞 #化like為coin

（為求貼地到肉，以下文章使用港式口語）

作為打工仔，工作上好多時都會令你有想死既感覺，唔知你每日遇過幾多想死既情況呢？

以下就有幾款可能會令你有想死既感覺︰

1. Last Minute至俾你做 D 要花費唔少時間去準備的 Mission Impossible 工作既老細或同事
   • 有野要做唔係問題，但老細或同事要臨到 Last minute 至俾 D 需要先花費唔少時間去準備至做得到既 Mission Impossible 工作你，咁就唔慌冇問題哩~~~！果種 Last minute 仲要係就算你要勁OT、通埋頂都搞唔掂果隻，最後你就俾老細或同事用呢個Mission Impossible 工作「送你一刀」，仲可能俾老細或同事話你辦事不力！
2. 明明已做哂所有急同唔急既工作，但未收工都要「扮工」到收工
   • 明明你好早就已經眼明手快地做哂所有urgent tasks，仲已經悶到連唔urgent既tasks都做埋，但都未到正常放工時間，但因為老細或同事唔鍾意人地在公司唔做野或 Hea 做，連上網睇網上時事新聞都唔得，你唯有開住公司電腦入面某一份工作文件，然後眼光光咁、魂遊太空咁、望穿秋水咁望住電腦既時鐘不斷心中倒數到收工……
3. 成日開埋D無謂既例會
   • 可能你覺得你份工最「有效率」既就係開例會，仲要密到每星期開一次例會，但 D 例會只係純粹循例兼任務式咁每個同事順序講一講真到下次例會之前有乜工作在手要處理，同埋使唔使找同事幫忙；而呢 D 野其實你唔使開會都可以搵同事討論或尋找支援，而開會的時間通常係半日，呢半日其實可以用來做 D 更有意義既事，例如完成一些 urgent tasks，你可以做野既呢半日，變相俾呢個例會「斷送」左……
4. 遇著擦鞋或卸膊既老細或同事
   • 當你正辛苦地埋頭工作既時候，你既老細或同事唔係在你面前向佢地上級擦鞋，就係在你面前將佢地既「鑊」大大力咁卸膊去你度硬食，搞到你「食屎咁食」、仲要「食到成身都係」，你冇得報仇之餘你仲要表面睇落面不改容地同佢地食哂 D 野佢，但心中想爆既「粗口」就千千萬萬句！
5. 遇著俾你更唔肯出聲或出手做野既老細或同事
   • 當你呢個小人物諗住開會時唔出聲做「無言的劉 X 華」全程齋聽住其他比你職級大既同事講野去take notes，可惜你勢估唔到你既老細或同事比你更加會做「無言的劉 X 華」，明明佢地係 call 開會既人，但唔只全程唔出聲，仲連其他人講野overrun左都唔sharp cut搞到會議overrun，仲要開親會都揀上午兼一開就幾個鐘，變相 cut 你 lunch time！
   • 咁都未算，最慘係當有人在會議上問你老細或同事某些工作既進度，佢地唔單止「無言的劉 X 華」，仲搞到對方因為佢地唔出聲回應而「擺你上枱」轉而問你，要你唔係焗住答佢少少再問老細或同事有冇補充，就係好「面燶」咁答你都唔知然後再公開問老細或同事……
6. 遇著會極速變臉既同事
   • 好多時你會覺得你既老細或同事似係一個「變臉大師」，對住上級果陣就笑到四萬咁口似執到金，對住你或其他下屬就黑面神到想打你地一鑊「甘」！而你老細或同事佢地當冇事冇幹果陣就對人和顏悅色，到出事果陣就對你報以唔多「老泥」的面色！
   • 一句講哂，老細或同事既「變臉大師」既造詣令你就算搵全宇宙最強既天文台都未必能準確預報，只能每次戰戰競競地自求多福……
7. 遇著你唔同佢一齊講人是非就會俾佢向人講你是非既老細或同事
   • 所謂「有人既地方就會有政治、有人既地方就會有是非」，但你萬萬都估唔到你會「躺著也中槍」！
   • 就係因為你唔「埋堆」同老細或同事一齊講他人昰非，佢地見你咁唔賣帳咁唔「識做」，就改為同埋其他人一齊講你是非，仲要有些是非係擺明屈你的，間接令你在公司「被變成不得人心既人」。
8. 臨收工前俾老細或同事阻你準時收工
   • 當你做完野好開心諗住可以準備收工果陣，你老細或同事總係會臨收工前幾個字或最後五分鐘至搵你，唔係叫你一齊去開會就係話「同你傾兩句，好快」，最後唔係一開會就兩個幾三個鐘，就係一傾就俾佢地捉住傾唔urgent既野傾左個幾鐘（但明明可以第二日至慢慢講，佢地第二日明明好得閒）。
9. 老細或同事樣樣野都話急、但可能樣樣都根本唔急
   • 有 D 老細或同事真係令你哭笑不得，佢地俾你既每個tasks都話係急，但可能大部分本身都唔急可以慢慢做，你都唔明佢地急乜，最慘係佢地永遠講 D 唔講 D，你想將 D tasks 根據重要性來排處理次序都唔得……唯有做到「謝」。
10. 老細或同事請假冇交帶，接手佢D野做到嘔
    • 你老細或同事搶左個檔期請左假搞到你請唔到假已經幾慘，你要接手佢既工作之餘仲要遇著佢地冇交帶又搵唔到人，搞到你忙到嘔、忙到「出煙」，但佢地返來仲要明示或暗示話你跟得唔好，果下你真係想「送佢兩隻中指」。

如果以上呢幾款，你老細或同事都中左唔少既話，咁除左恭喜你之外，唯有叫你加油繼續頂硬上直到你找到新工，由「一個地獄跳到另一個地獄」為止。

讀者如喜歡這篇文章 ，可於文章最下方按下Likebutton以示鼓勵及支持（若LikeCoin用戶請先登入再按下Likebutton ，最多可按5下，而其他人士也可以了解LikeCoin及考慮是否註冊使用LikeCoin ）

而加入 LikeCoin 回饋創作者計劃，更有免費獲得coin的活動：

1. 註冊一個 LikeCoin ID (邀請人請填： tracy2018)
2. 確認已登入 LikeCoin (確認方法)
3. 點擊五下拍手(操作參考)
4. 完成後，你我都會獲得免費的 LikeCoin (可用來交換以太幣或現金)

讀者在看完這篇文章以後，若有興趣也可以閱讀其他相關的分享文章︰

#香港 #工作 #生活 #化讚為賞 #化like為coin

你總會聽過「愛的反面就是恨。愛一個人有多深，當愛已逝時，你恨那個人就會有多深」，事實又是否如此？

小編答︰不一定的！

你恨「那個人」有多深，視乎你愛「那個人」到以下哪一個點︰

1. 當時只是愛得表面
若你愛「那個人」只是表面地因為「外在美」的條件如樣子、身材、身家、對方當自己是王/神來「供奉」，當「未（愛）到深處已無情」時，你只會象徵式地在極短的時間裏去「恨」那一位仁兄。因為你深明「一雞死、一雞鳴、何須孤寂到天明」的道理，你不會浪費尋找另一位可以讓你去愛的仁兄，即使只是「愛到表面」，最少你不會甘於孤寂、不會讓自己的戀愛空窗期太長久。

2. 當時愛得轟烈
若你愛「那個人」是愛得轟轟烈烈，而雙方都付出過不少心力但又時有爭執，當愛已逝時，便會「愛得轟烈、死得慘烈」，因為你對「那個人」的「積怨」存在心中已久，因此想要「爆」向對方的「粗口」可能比除夕煙花更燦爛更精彩；因此你會去「恨」那一位仁兄一段較長的時間，直到你實行「要忘記一段舊情，便須發展一段新戀情」為止，你便會慢慢自動淡忘之前的「那個人」。

3. 當愛到心深處、成為本能反應
若你愛「那個人」已是愛得很深、愛到心坎中，但因為種種環境因素令你們不能走到最後而心受重傷，例如︰被編感情、生育問題、地位太過懸殊、遭家人棒打鴛鴦、世俗眼光太刺眼等。雖然你十分明白「要忘記一段舊情，便須發展一段新戀情」，但由於你難以忘卻你最愛的那粒「愛情無花果」，每每本能反應地、情不自禁地想起「那個人」的種種，引致令心中用來搜尋愛情的「心路GPS」閉鎖故障，很難再發展一段新戀情。

你雖然愛得太深，但你反而沒有太恨「那個人」，而是昇華到更深的層次 — — — 「後悔」或「感激」。
你「後悔」和重傷你的「那個人」走得太近；你「後悔」付出感情在重傷你的「那個人」身上；
你「後悔」和被迫分離的「那個人」沒有創造更多彼此的回憶；
你「後悔」和被迫分離的「那個人」沒有變得更堅強去維繁感情克服阻礙；
你「感激」重傷你的「那個人」讓你親身體驗「人生總會遇上幾個人渣」；
你「感激」被迫分離的「那個人」陪你經歷過人生中其中一段難忘的日子；
然後……因為太痛了……你已是痛到對這段「情已逝」再無強烈知覺了……

總括而言，愛的反面未必就是只有恨，愛一個人有多深，當愛已逝時，你未必真的就會恨那個人有多深，可以是另一種比「恨」更複雜的感覺。

讀者如喜歡這篇文章 ，可於文章最下方按下Likebutton以示鼓勵及支持（若LikeCoin用戶請先登入再按下Likebutton ，最多可按5下，而其他人士也可以了解LikeCoin及考慮是否註冊使用LikeCoin ）

而加入 LikeCoin 回饋創作者計劃，更有免費獲得coin的活動：

1. 註冊一個 LikeCoin ID (邀請人請填： tracy2018)
2. 確認已登入 LikeCoin (確認方法)
3. 點擊五下拍手(操作參考)
4. 完成後，你我都會獲得免費的 LikeCoin (可用來交換以太幣或現金)

讀者在看完這篇文章以後，若有興趣也可以閱讀其他相關的分享文章︰

#愛情 #情侶 #關係 #化讚為賞 #化like為coin

（為求貼地到肉，以下文章使用港式口語）

唔知大家平時出街或者返公返學有冇搭過開車程有一小時或以上既巴士呢？如果有既話，大家又有冇留意架車裏面係咪多左人會全程坐樓梯直到佢地自己落車或者上層有人落車？

小編近年因為工作需要，需要每日搭車程有一小時或以上既巴士往返市區，就發現每日都會有唔同既人因為巴士上下兩層都已經冇位坐而索性坐樓梯直到佢地自己落車或者上層有人落車；當中有內地人（大叔同大媽都見過）、南亞裔人、外國男士甚至係香港本土大叔。

你地以為巴士司機「闊佬懶理」咩？少年，你地都太年輕太唔了解佢地「啦」！小編見過巴士司機佢地唔只一次勸過D坐樓梯既人落番巴士下層企，但D人唔聽同埋一於少理，一副「放棄接受治療」咁既款，咁巴士司機佢地咪焗住「放棄治療」囉！唔通要巴士司機佢地唔開車企正樓梯口度話到D坐樓梯既人肯企為止咩，唔得架嘛，想佢地俾全車人因為趕時間而粗口問候同拍片上網咩！

或者你地會話，巴士公司加密D班次等少D人坐樓梯咪得囉！講就易，做就唔係咁易啦！同埋問題都唔關巴士班次事！

點解巴士公司唔係咁易加密D班次？巴士公司要夠巴士司機用至得架。

搭巴士同搭港鐵唔同，D人有機會兜口兜面見到個巴士司機，咁自然D人有機會兜口兜面對果個巴士司機打打鬧鬧，尤其是當搭車D人係唔理智既「怒漢」型大叔、「野蠻」型大媽，甚至係精神唔多好唔多清醒既人。

巴士司機開左好耐車之後，再埋站後去廁所大小二便，痾耐左至再開下一轉車，又有機會俾人話；

巴士司機埋站耐左少，又有機會俾人話；

巴士司機唔開遲少少剛剛遲來趕到搭車既人，或唔開番車門俾剛剛遲來趕到搭車既人，又有機會俾人話；

巴士司機開遲少少預埋遲來趕到搭車既人上埋車至開車，搞到其他趕時間既人變相遲左到目的地，又有機會俾人話；

話、話、話、話、話，巴士司機日日都有機會俾人話，人工福利又唔係特別多，仲可能分分鐘一日開車十幾粒鐘，更可能會隨時遇著郁D就出手打人既「野蠻」型大媽兼俾佢地打到差D入醫院「度假」……你以為拍戲至有呀？近期就已經有一單︰

火爆大媽狂毆巴士司機 被扯頭髮撼頭司機痛苦慘叫︰
https://topick.hket.com/article/2253664/%E7%81%AB%E7%88%86%E5%A4%A7%E5%AA%BD%E7%8B%82%E6%AF%86%E5%B7%B4%E5%A3%AB%E5%8F%B8%E6%A9%9F%E3%80%80%E8%A2%AB%E6%89%AF%E9%A0%AD%E9%AB%AE%E6%92%BC%E9%A0%AD%E5%8F%B8%E6%A9%9F%E7%97%9B%E8%8B%A6%E6%85%98%E5%8F%AB

巴士車長被摑扯髮 警通緝兩惡「大媽」︰
http://hd.stheadline.com/news/realtime/hk/1413231/

【欺凌車長】搬行李碰撞爭執 國語大媽愉景灣狂扯司機髮撼頭埋窗︰
https://www.hk01.com/%E7%AA%81%E7%99%BC/283788/%E6%AC%BA%E5%87%8C%E8%BB%8A%E9%95%B7-%E6%90%AC%E8%A1%8C%E6%9D%8E%E7%A2%B0%E6%92%9E%E7%88%AD%E5%9F%B7-%E5%9C%8B%E8%AA%9E%E5%A4%A7%E5%AA%BD%E6%84%89%E6%99%AF%E7%81%A3%E7%8B%82%E6%89%AF%E5%8F%B8%E6%A9%9F%E9%AB%AE%E6%92%BC%E9%A0%AD%E5%9F%8B%E7%AA%97

咁你地叫巴士司機仲點會好聲好氣呀，有時你地搭車好彩仲會聽到巴士司機燥底到會細聲爆「粗口」添！唔係講笑，小編唔只一次搭巴士見識過！

有D巴士司機若然更唔好脾氣，仲會引發交通意外架！2018年2月就已經有一單交通意外係因為巴士司機疑似故意撞車，仲好似係香港史上第二嚴重既巴士事故添呀！

唔信？大家不妨睇番以下既新聞報導回顧一下︰

兼職車長與客爭吵發脾氣 意外後只顧WhatsApp 留言「聽朝會報紙A1」︰
https://hk.news.appledaily.com/local/daily/article/20180211/20302145

死亡九巴：乘客狂插車長發脾氣 「揸到似舞龍」︰
https://hk.on.cc/hk/bkn/cnt/news/20180210/bkn-20180210200320562-0210_00822_001.html

車長出事前疑與乘客爭執 發脾氣開快車︰
http://news.wenweipo.com/2018/02/11/IN1802110003.htm

香港奪命巴士19死 疑司機賭氣超速釀禍︰
https://news.tvbs.com.tw/focus/869781

香港雙層巴士翻覆案19死65傷 乘客：司機好像在賭氣︰
https://dq.yam.com/post.php?id=8825

唉，一份咁吃力不討好既工，仲邊有新人肯入行呢？除非為左好深既愛同埋為左好深既責任囉！咁冇新人肯入行可以點？咪D舊人（現職巴士司機）一更開越來越多鐘數頂硬上囉，然後捱到開車冇精神增加撞車交通意外風險囉！冇計架，佢地唔開車，唔通你地去開車咩？

點解問題唔關巴士班次事？

咪玩啦，俾盡每隔3分鐘一班巴士好未？類似既「坐樓梯」事件都係會時有發生架！因為香港流動人口只會不斷增加，除左香港人仲會有大量內地人、大量南亞裔人同其他外國真、假難民、仲有外國居港人士及外國遊客，只要佢地嫌貴夾轉車唔方便而唔去坐港鐵，咁自然係去迫巴士啦，咁搭巴士既人只會有多冇減，咁就算加得再密都唔會點樣疏導到迫車情況。

同埋最重要既係，只要架巴士上下兩層都冇位坐，而D人又唔想企住搭車，咁佢地自然會坐樓梯，甚至坐巴士下層既地下！好出奇咩？小編見唔少內地人咁樣坐地下坐巴士啦！

所以問題唔係好關巴士班次事，而係睇搭巴士D人有幾勁腳骨力、有幾勁毅力去企足全程咁滯、同有幾文明幾有品！唔係既話，佢地話之你地話佢咁坐會增加炒巴士風險啦，不於少理照坐樓梯坐地下，真係出事再算！

以後大家出街或者返公返學搭D開車程有一小時或以上既巴士果陣，就留意下架車裏面係咪有人會全程坐樓梯直到佢地自己落車或者上層有人落車啦！無他既，有留意咪有D野會有心理準備囉！

讀者如喜歡這篇文章 ，可於文章最下方按下Likebutton以示鼓勵及支持（若LikeCoin用戶請先登入再按下Likebutton ，最多可按5下，而其他人士也可以了解LikeCoin及考慮是否註冊使用LikeCoin ）

而加入 LikeCoin 回饋創作者計劃，更有免費獲得coin的活動：

1. 註冊一個 LikeCoin ID (邀請人請填： tracy2018)
2. 確認已登入 LikeCoin (確認方法)
3. 點擊五下拍手(操作參考)
4. 完成後，你我都會獲得免費的 LikeCoin (可用來交換以太幣或現金)

#香港 #社會 #生活 #化讚為賞 #化like為coin

（為求內容貼地到肉，以下文章會用港式口語）

之前講完TVB劇《大帥哥》是有幾勁，今次就講一下點解TVB劇《守護神之保險調查》明明咁大卡士咁大製作都會唔Hit。

《守護神之保險調查》唔Hit「死因」有幾個︰

1. 演員冇熟悉感、場景冇代入感

中港合拍片唔係問題，部分演員起用內地演員去拍都唔係問題，但都唔好搵D香港人見又未見過、名又講唔出既內地演員嘛！

中港合拍片唔係問題，大部份場景內地拍而只有小部分車站景、馬路景、工商業大樓景在香港拍都唔係問題，但都唔好在內地場景度有對白寫果D角色係正身處香港地嘛，香港地咁細，香港觀眾點會認唔到D場景係咪香港地呢！

要香港觀眾睇一套大部份場景係內地、而演員又有唔少係未見過認唔出既內地演員、但故事係講緊香港境內發生既事！

粗俗D咁講句，「咁樣觀眾好難FF自己去代入劇情度又點樣自High呢，咁又點會派Like俾套劇呢」！

2. 歌曲「唔啱音」

搵A-Lin、品冠等台灣出名歌手去唱劇集主題曲同插曲係好，但你要人地台灣歌手夾硬去用廣東話唱一D本應只係適用以國語唱既歌，搞到D歌詞既音聽落「唔啱音」咪一D都唔好囉！

套劇有廣東歌曲係會有香港味道，但若套劇既廣東歌曲聽落怪怪地但用國語唱又唔錯喎，咁咪變左「有怪味的香港味道」囉！

直接D講句︰浪費哂呢批台灣出名歌手可以為劇集帶出來既Gimmick！

其實以前TVB有唔少經典劇集D廣東歌曲都唔錯架, 不論用廣東話定國語唱都OK架，如《天地男兒》、《笑看風雲》等，不過之後冇乜劇集歌曲有呢個勢……

3. 故事情節唔吸引
劇集似係用多個保險Case單元故事再加幾條主線去鋪排，但整體俾人感覺情節有D鬆散，唔夠吸引。

舉一個例子來比喻，劇集就好似廚師炮製既食物，而觀眾就好似食客，「好食」與否並非睇食材有多名貴及煮食時花幾多功夫，而係要睇廚師有幾用心去了解食客想吃乜野同埋有幾咁用心去煮食裏面既各個細節；肯將心比心地用心才會有好美食、好劇集。看來，綜觀近年香港劇集，較少有「港式美食」……

讀者如喜歡這篇文章 ，可於文章最下方按下Likebutton以示鼓勵及支持（若LikeCoin用戶請先登入再按下Likebutton ，最多可按5下，而其他人士也可以了解LikeCoin及考慮是否註冊使用LikeCoin ）

而加入 LikeCoin 回饋創作者計劃，更有免費獲得coin的活動：

1. 註冊一個 LikeCoin ID (邀請人請填： tracy2018)
2. 確認已登入 LikeCoin (確認方法)
3. 點擊五下拍手(操作參考)
4. 完成後，你我都會獲得免費的 LikeCoin (可用來交換以太幣或現金)

讀者在看完這篇文章以後，若有興趣也可以閱讀其他相關的分享文章︰

#香港 #娛樂 #劇集 #流行文化 #化讚為賞 #化like為coin

由於《香港你、我、他》是圍繞香港的「低俗貼地」短篇單元故事，是發生在你、我、他身邊的日常，因此內容多為港式口語及粗言穢語，敬請留意。

我係大B，一出世就住元朗公共屋邨，大大話話都住左幾十年，見住元朗呢幾十年慢慢係度變，近呢十年八年仲要變得快過火箭升空添呀！

舊陣時元朗呢度幾靜架！因為呢度除左有元朗最長、最旺既「納米版彌敦道」 — — — 元朗大馬路 — — — 之外，就只有呢條大路後面的教育路多人行街買野，再唔係就有大棠路果條小街去「掃街」買野食（好似去旺角「掃街」咁），而大大細細既商場只得幾間︰新元朗中心、千色商場、元朗廣場、同益商場、合益商場、喜利商場、交通廣場等，而唔計零零星星既屋邨街市，市政局大街市就有兩個︰合益街市、大橋街市；所以呢度係幾與世無爭咁既Feel架，好幾年前唔少市區人仲以為元朗仲係好多人種牛耕田架咋~~~！

當放寬左內地自由行之後，呢度就改變得翻天覆地，同以前完全係第二種Feel！變成點，等土叔我慢慢數過你地知啦！

1. 公共屋邨元朗邨冇左，而貴價私樓世宙、朗屏8號出現左、而貴價樓朗城滙未起好都推出左（個電視樓盤廣告仲有少少「祖國的風味」添︰https://www.youtube.com/watch?v=LkWsakrUC0w）；

2. 同益商場、合益商業中心俾南亞人成功「佔領」左；喜利商場、嘉城商場（前身嘉城酒樓）有近一半舖頭執鬼左，行呢兩個商場既人少鬼左；

3. 元朗市中心、千色廣場個名改鬼左（前者改左叫YOHO MALL，後者改左叫千色滙）；

4. 好多金舖藥房開左，更多既其他舖頭執左；

5. 大橋街市上面既圖書館搬走左；

6. 街上行既本地人少左，而非本地既人就多鬼左；

而當近前開通左港珠澳大橋之後，以上的問題仲變本加厲左。

因為佢地來密左同來既人多左，好似農民土豪咁既人多鬼左，街上大大聲講野有口音既人多鬼左，痞地食野等人既人多鬼左，隨地吐痰大小二便既人多鬼左，唔守規距打橫來既人多鬼左；

你以為一個「華麗轉身」由佢地身邊閃開左，你對腳都會照樣俾非本地人用佢地既行李以勁過南韓冰壺選手推壺的殺傷力無情情咁「車」中左；

你以為好彩地再一個「華麗轉身」由佢地身邊再閃開左，跟手你個Body都會照樣俾非本地人用佢地好似「食過夜粥（既力道用佢地既「有理冇理話之你手肘批」三兩下「批」中左（仲「食」到正一正添）；

而因為佢地來密左同來既人多左，我地一家大細男女老少既生活習慣唔同左；

出元朗行街、買野？
D野貴左，我地出少左、買少左，通常在家網購搞掂左，做宅男宅女好過；

去茶樓飲茶？
D野食貴左味道差左，而留在家煮食多左，反而在家食野好過；

出市區周圍行下？
人多左搞到平時返工返學需要迫車等車的次數多左，週末的市區交通擠迫問題仲嚴重左，咁仲要出市區行？真係前世未同人迫過！？出街會俾非本地人迫到暈迫到癲果種厭惡感多左，想出市區的意欲大大減少左，留在家中休息一下好過；

其實土叔我已經好知足常樂，我明白「時代變、人物風景都改變」同埋「時代變、又一間消失小店」，對比其他香港旅遊區或內地來港平價遊既區域，呢區我覺得真係已經算「比上不足、比下有餘」架嘞，只要唔好再進一步慢慢惡化到好似出面市區咁既景況就得架嘞！

讀者如喜歡這篇文章 ，可於文章最下方按下Likebutton以示鼓勵及支持（若LikeCoin用戶請先登入再按下Likebutton ，最多可按5下，而其他人士也可以了解LikeCoin及考慮是否註冊使用LikeCoin ）

而加入 LikeCoin 回饋創作者計劃，更有免費獲得coin的活動：

1. 註冊一個 LikeCoin ID (邀請人請填： tracy2018)
2. 確認已登入 LikeCoin (確認方法)
3. 點擊五下拍手(操作參考)
4. 完成後，你我都會獲得免費的 LikeCoin (可用來交換以太幣或現金)

讀者在看完這篇文章以後，若有興趣也可以閱讀其他相關的分享文章︰

#香港 #社會 #生活 #化讚為賞 #化like為coin

相信近日大家閒時討論的新聞都離不開香港政府早前宣布，下月起將申領長者綜援的年齡門檻由六十歲調高至六十五歲。

歸納直至目前為止的各方新聞報導，這個政策看似衍生了以下的景況︰

1. 泛民主派及建制派議員突然罕有地「團結一致」強烈反對這個早前已被議員們大比數通過的調高長者綜援政策（以人數佔多的建制派議員全投贊成票、人數佔少的泛民主派議員大多投反對或棄權票）；
2. 特首無意因為泛民主派及建制派議員突然罕有地「團結一致」強烈反對而撤回這個政策，因為議員早已大比數通過《財政預算案》，等於大比數通過《財政預算案》中所有政策，包括調高長者綜援申請年齡門檻，並對議員的反對表示震驚；
3. 建制派議員表示他們更為震驚，暗示給特首出賣，即被特首「擺左上枱、過左一棟」，說他們當時沒有為意施政報告中有細細的條文提及此一項政策，而他們為避免政府有財政危機才贊成通過《財政預算案》而非表示贊成通過《財政預算案》中所包含的此政策，日後會考慮將政府預算案「驗屍咁驗」；
4. 調高長者綜援政策未知有否合理基礎免致違背《基本法》中的社會福利權；
5. 有說因為建制派議員的選票大多來自年長的一群，特首的「出賣」隨時令他們有流失選票的危機，因年長的一群會以為被他們?牲了自己的福利，被他們背叛了；
6. 有說特首認為既然香港很多其他長者福利的申請年齡門檻都是65歲，因此長者綜援都要「睇齊」，而且她認為很多60歲至65歲的年老一群都還是有心有力地工作，例如她自己，因此此政策對社會不會有太大影響；

未知大家又對這個政策有甚麼感想呢？

小編覺得︰

特首可能貴人事忙，未必知道除了他們政府高官年過60尚何有心有力外，社會上50至65歲的長者大多從事草根階層工作並已經有心無力，他們大多不是身體有疾病未能再繼續工作，就是他們老闆覺得他們年事已高不能勝任而借故辭退並被「後生仔」頂上他們的位置；就算有心有力還在工作的長者，大多只是因為生活窮困不足以維持生計才會無奈地「焗住、頂硬上」繼續工作。這些長者因長期人工微薄，就算「食老糧、食穀種」都不能維持生活太久，很快便需要申請政府長者綜援才能勉強過活。而特首的調高長者綜援申請年齡門檻政策，變相向這些長者「開刀」，令他們生活百上加斤、雪上加霜。

特首不想撤回已被議員大比數通過的調高長者綜援申請年齡門檻政策，可能怕若開了撤回已通過政策的先例，日後有機會對施政進程有影響；但若然政策在社會上各方都有很大的反對聲音，甚至政策「大失民心」的時候，又是否能再考慮斟酌處理「格外開恩」地撤回政策或者暫緩推行政策呢？

若真的是撤回政策不可行，那麼在撤回政策以外，又有否其他方法能平息社會上各方的反對聲音？

加入修款令60至65歲而又未能再繼續在社會工作的長者可以「豁免」，准許申請長者綜援？

和「關愛基金」額外增加政策去為60至65歲的長者提供近乎長者綜援的援助又是否可行？

此外，社會上也有聲音認為由內地來港的「新香港人」申請綜援就「易過借火」而有需要長者申請長者綜援就面對重重關卡似「燈蛾撲火」，有些「新香港人」還抵港不久就立即申請綜援，完全無意欲出去找工作謀生只想政府「供養」，還嫌「供養」的金錢（即綜緩金）過少，只能讓他們應付必要開支，未能讓他們像其他有工作的人一樣過著有錢花費娛樂的休閒生活。政府又會否考慮增加由內地來港的「新香港人」申請綜援的門檻，避免造成由內地來港的「新香港人」濫用綜援呢？

大慨，特首和她的政治班子需要更了解民間疾苦並有更高的政治、行政及管理智慧才能化解這次的政策分歧了。

不過肯定的是，今次政策分歧令建制派受到一定的打擊，他們的票源大多來自被他們的「蛇齋餅糉」所感染的「鐵粉」長者選民，而他們應對此政策的處事手法無擬有機會令部分「鐵粉」長者選民不再被「蛇齋餅糉」所感染，皆因長者選民的切身福利受損，當然仍會有一些長者選民繼續被他們的「蛇齋餅糉」所感染而遺忘他們此役，因此打擊未至於會把他們擊潰。

最後，小編想起一句似曾相識的說話頗為切合目前的情況，「世界太簡單，人類太複雜」，而人心的「複雜」，在於有「人」的地方就會有複雜的政治，共勉之。

讀者如喜歡這篇文章 ，可於文章最下方按下Likebutton以示鼓勵及支持（若LikeCoin用戶請先登入再按下Likebutton ，最多可按5下，而其他人士也可以了解LikeCoin及考慮是否註冊使用LikeCoin ）

而加入 LikeCoin 回饋創作者計劃，更有免費獲得coin的活動：

1. 註冊一個 LikeCoin ID (邀請人請填： tracy2018)
2. 確認已登入 LikeCoin (確認方法)
3. 點擊五下拍手(操作參考)
4. 完成後，你我都會獲得免費的 LikeCoin (可用來交換以太幣或現金)

#香港 #社會 #生活 #化讚為賞 #化like為coin

相信近期不少男女老少香港人都有追看TVB電視劇《大帥哥》，甚至有人說《大帥哥》能令觀眾再追港劇（實指TVB劇）。那究竟，《大帥哥》真的能再帶動追劇（實指TVB劇）文化？

說真的，近年連小編這個宅人也少了追看新的TVB劇，即使會觀看TVB劇，但大都只視為飯前飯後到睡前的消磨時間的活動之一，不會引起我希望快點可以看到下一集的衝動，也不會因為中間少看了某一兩集而特別覺得可惜。若要追看港TVB劇，小編不禁會想︰「追新TVB劇？我追ViuTV劇、港台劇、MyTV機頂盒的中日台韓劇或經典TVB劇唔好！？仲好睇啦！？」說真的，若要在《守護神之保險調查》和深夜重播的《義不容情》之間取捨，小編會選擇深夜重播的《義不容情》，因更有追看的吸引力。這也可能是為何近年TVB的處境劇有時較晚間劇收視更高，因前者更有吸引力去追看。

若要說《大帥哥》為何有這麼多人追看，小編覺得可能因為以下幾種原因︰

1. 沒有沿用既定的「TVB神劇方程式」，「膠」味淡

這部劇和之前也是不錯的TVB劇《跳躍生命線》一樣，沒有沿用既定的「TVB『膠』味神劇方程式」 — — — 「好人一定有好報，壞人一定有報應」、「最後主要角色一定會大團圓結局」甚至「一家團聚BBQ」，而是改為藉著不同角色的「高山低谷」經歷及故事，帶出「人有悲歡離合，月有陰晴圓缺，此事古難全」，給予觀眾「人生不會完美，更會有遺憾，人們只能在痛過傷過後帶著不同的遺憾慢慢學懂堅強地一步一步向前行」的感覺

而這部劇雖然有小部分場面有點「膠」味，但「膠」得來又不算突兀、不算讓人生厭，整體來說這部劇的劇情發展走向到位，不會「到喉不到肺」。

2. 劇中角色夠立體

這部劇最「吸力強勁」的地方，就是劇中幾乎每個角色都十分立體。

即使是扮演小量出鏡的商店老闆、商店員工及府邸佣人的甘草綠葉演員們，都不會只有刻版式的「行行企企」戲份，而是可以有不同的喜怒哀樂表情、對白，甚至會有和主要角色的對手戲，立體地呈現出把他們的角色設定，對劇情的變化起了不可或缺的關聯作用及襯托作用（請留意，小編說的不是陪襯作用而是襯托作用，甘草綠葉演員們不是劇集來的陪襯「擺設」而是有份兒帶出「劇味」、托起及加強劇情發展的演員）。

3. 劇組台前幕後上下齊心

這部劇另一個最重要的地方，就是劇組台前幕後上下齊心。

雖然一部劇要成功有口碑不一定會有好收視、更不一定會有獎項甚至成為「最佳劇集」，但是一部劇要成功有口碑不只要有好劇本、好演員，更要有好的士氣及好的台前幕後凝聚力，才能成為觀眾心中的「值得追看的好劇集」甚至是「經典劇集」，並成為劇中演員們的代表作之一。

最令小編深刻的是，這部劇集是男主角張衛健的久違了的港劇作品，他除了參演劇中第一主角外，間中還會和幕後一同研究並臨時劇本修改（即演藝行業內俗稱的「飛紙仔」），但他這樣做不是為了增加自己戲份，而是為了強化劇集內容。例如︰

他會為自己的角色加入很多急速「長氣」的「一輪咀」對白去「搵著自己來搞」，只是為了突出他的大帥角色是一個以智力和急才去險中取勝的人。

他會為了令其他主要演員及甘草綠葉演員們的角色更立體有更好發揮，而研究強化主要演員的演譯，甚至為甘草綠葉演員們加戲份加對白。

他會為了令某一個場景的劇情更有「戲味」而和幕後一起修改並強化劇本，並且每次都讓幕前的相關同事仔細了解修改部分，確保幕前的相關同事都能處理得到修改的部分。

他會為了慰勞大家辛勞及鼓勵大家士氣而私人出資買小食等給全劇仝人享用。

以上種種，張衛健是為了自己而做嗎？絕對不是。要知道他已擁有不少經典代表作而且在中港兩地都有一定知名度的歌視兩棲明星，而他的地位根本不需要這樣去為自己「搶Fo」。種種臨時劇本修改，他是為了整部劇集的幕前幕後而做，為了他們的心血及努力而做。因此和他合作這部劇集的幕前演員大多都沒有非議他間中臨時劇本修改的驚喜（驚的是自己不知能否演譯好，喜的是劇集出來效果好），也大多都心悅誠服地讚同甚至感謝他為劇集的付出。

正因如此，當《大帥哥》今年未開播已有提名但最後空手而回時，同劇演員全都戥張衛健可惜，因他們認同他的實力及付出值得獲取「我最喜愛的男主角」。也正因如此，《大帥哥》開播後吸引了不少觀眾追劇，有部份更是已很久沒有看TVB劇的觀眾，而且對劇集讚多於彈，並取得不錯的收視。

由此看來，《大帥哥》看似真的能再帶動追劇（實指TVB劇）文化？可惜的是，小編覺得不大可能，因為《大帥哥》只能帶來一陣子的追劇熱潮，但熱潮會除著這部劇集終結而退卻，若要帶動追劇（實指TVB劇）文化，除了這部劇有不少觀眾追看及讚同外，也必須要之後接連推出同等吸引力的劇集，而緊接《大帥哥》後的劇集的吸引力，目前看似是無以為繼……

且看快將播完的《大帥哥》陣容，除了主角張衛健外，還有「原來佢地D戲都唔係之前咁屎」的蔡思貝、洪永城，還有「原來佢地唔只得個樣靚做戲都唔差」的蔡思貝、楊秀惠、譚凱琪，還有「俾多D戲佢地做都唔錯」的曹永廉、徐榮及李嘉，還有「認得出佢個樣、未必叫得出佢個名、但又做得唔錯」的甘草演員們。

但緊接《大帥哥》其後推出的劇集《荷里活有個大老千》，從預告式的劇集廣告看來，除了主角是實力派的鄭則士及另一較出名的演員李施嬅之外，沒有其他吸引力去讓觀眾追看，加上劇集題材是被拍到爛的賭博恩怨情仇情節，就算它另外有實力派演員如秦沛、金燕玲、張慧儀等參演，也難以吸引看賭博恩怨情仇看到爛的觀眾去追看。希望這部新劇正式播出後，會有意想不到的驚喜，會讓觀眾覺得「原來有彩蛋」及劇集還算不錯啦……

讀者如喜歡這篇文章 ，可於文章最下方按下Likebutton以示鼓勵及支持（若LikeCoin用戶請先登入再按下Likebutton ，最多可按5下，而其他人士也可以了解LikeCoin及考慮是否註冊使用LikeCoin ）

而加入 LikeCoin 回饋創作者計劃，更有免費獲得coin的活動：

1. 註冊一個 LikeCoin ID (邀請人請填： tracy2018)
2. 確認已登入 LikeCoin (確認方法)
3. 點擊五下拍手(操作參考)
4. 完成後，你我都會獲得免費的 LikeCoin (可用來交換以太幣或現金)

讀者在看完這篇文章以後，若有興趣也可以閱讀其他相關的分享文章︰

#香港 #娛樂 #劇集 #流行文化 #化讚為賞 #化like為coin