Daily Archives

One Article

嬉笑怒罵/工作

打工仔痛苦篇 之 令人嬲到想「爆粗」鬧老細既時刻

Posted by slienceblack on

打工仔最嬲到想爆粗既唔會係人工低,亦唔會係跟同事唔夾/俾同事講是非,而係跟住一個無時無刻都「無料」到要駁俾人「小」既老細;仲要唔係「無料扮四條」而係「無料當正自己係同花順」既老細,「無料扮四條」既老細都會有自知之明,知道自己有不足而扮到自己有能力,「無料當正自己係同花順」既老細係連自知之明都冇,以為自己好有能力而人地冇能力配合唔到佢既步伐。而呢D「無料當正自己係同花順」既老細都會有好多令人嬲到想「爆粗」鬧佢既時刻。

[內文中X為港式粗口,請自行以合適字眼代入,敬請留意]

1. 乜都唔講就以為你識哂明哂

「無料當正自己係同花順」既老細通常會覺得你就算唔係佢肚入面條小蟲都要識同佢神交或腦電波通訊;因為佢要你做既野一開始通常係乜都唔講就以為你識哂明哂,然後你唔識唔明果陣,佢會好錯愕咁用動作表情或言語表示「乜你唔識唔明架咩?(對我)好簡單咋喎!(咁真係)唔好意思呀……」。

面對呢D老細,不禁令人想「小」佢︰喂呀~~~你冇X野呀!?你一開波乜X野都唔講搵鬼識搵鬼明你想做乜咩!?咁神秘你自己做X埋佢咪叫我搞嘛!?

2. 唔俾料就叫你做野

乜都唔講都未算絕,「無料當正自己係同花順」既老細就算粗略交帶你做野之後都會乜相關資料都唔俾就叫你做野,仲要問極佢都唔俾相關資料,因為覺得唔使俾你或你唔需要知果D係乜野資料,但同佢講極佢都頑固到唔知佢唔俾呢D資料係你做唔到佢俾你做既野。

面對呢D老細,不禁令人想「小」佢︰X~~~乜料都唔俾人叫人點X做呀!?你搵鬼做呀笨!?D鬼識穿牆穿櫃桶去搵你手上有D資料咪唔X使勞煩你俾料囉好冇!?

3. 臨deadline至摧人野/叫你摧人野

好多「無料當正自己係同花順」既老細唔知點解都好鍾意唔臨到deadline都唔醒起要摧users試野同俾意見,若佢怕揹鑊就會叫你去摧人做野,若佢覺得唔會有事至會親自摧人做野;又埋怨人地users太忙唔得閒試佢野或唔得閒主動答佢D野試左未同有乜意見,有時仲要埋怨你做乜唔早D幫手摧下users試野俾意見。而唔該留意番,果D users職級同地位通常都係俾你老細高。

面對呢D老細,不禁令人想「小」佢︰摧、摧、摧、我摧你條命~~~!?我早D摧又話唔好咁chur人地,我遲D摧又話做乜咁遲至摧,咁你自己唔last minute都唔開始摧又唔X見你覺得遲!?「On L 7 9」(此為粗口,不多解釋)!?

4. 唔聽人講、自己做漏/錯野又私下屈係你或隔離組既人做漏/錯野

「無料當正自己係同花順」既老細常見既通病就係當正自己係「大帥哥」係所有projects入面「誰大誰惡誰正確」果個,乜都係佢自己最大,唔只要你配合佢做佢既野,唔聽你講、唔准你非議佢做法,仲要同佢合作既其他小組一樣要配合佢做佢既野,唔聽人地講、唔准人地非議佢做法,即使人地小組的人比佢職級地位高及人地D Project俾佢手上Project更大,佢都一概不理、「話之佢地死」。最慘係,佢下下做既野都係「伏」味濃到「宇宙大核爆」,team kill全家,不論係你自己定係其他合作既小組都無一倖免,仲要私下屈係你或隔離組既人做漏/錯野,搞到佢要「好心幫下你」做埋你地果份,但又做得唔掂要其他人執佢手尾,兼周圍唱通街話你或隔離組既人做漏/錯野。

面對呢D老細,不禁令人想「小」佢︰你家陣係CEO咩!?做野亂哂坑咁,有乜咁大X哂呀你!?你整出來D「屎」同「鑊」就大~~~係掂既就自己一條友食番哂佢嘛!?咪X推哂俾人焗住幫你食完仲要俾你屈住四圍咁唱嘛~~~!?

5. 臨deadline至發現自己做漏野而叫你臨時跟進果D野

「無料當正自己係同花順」既老細久唔久就會臨deadline至發現自己做漏野而叫你臨時跟進果D野,最慘又係有上面第1、2、4項提及既通病︰乜都唔講、唔俾料就叫你跟進叫你做、唔聽人講、自己做漏/錯野又私下屈係你或隔離組既人做漏/錯野。

面對呢D老細,不禁令人想「小」佢︰你唔好再遲D等過埋deadline到出年拜山果陣至俾我同你執屎!?仲要乜X野資料都唔俾人就叫人同你urgent咁執,你估咁遲咁急咁趕奉旨寫包單實執到架!?執唔到又推隻「鑊」落人地度!?

6. 會議或討論公事時亂入兼亂X咁講野,做野時亂來但又唔掂要求救

「無料當正自己係同花順」既老細令你要忍笑既場口係,佢會在會議或討論公事時亂入兼亂X咁講野,作為公司小職員既你通常冇得點say,只做「花生友」見住每次佢亂入時俾隔離左右既會議者不停閘住佢兼糾正佢講錯野,同見其他會議者對佢亂入的微微恥笑。

另一個「無料當正自己係同花順」既老細令你要忍笑既既場口係,佢會在做野時由初頭意氣風發以為單野好簡單佢好快好易就搞得掂可以在你面前show off顯威風,慢慢到中期心知不妙要每步google search同「打電話問功課」(問其他佢覺得會識搞佢單野既同事),到最後期面青或面如死灰好細聲咁叫你打電話搵人求救幫佢拆掂單野。

面對呢D老細,不禁令人想「小」佢︰家陣你唔出聲冇人話你啞架!?唔使下下出來「77貢」亂X咁入亂X咁講搏「小」來證明自己存在架!?同埋家陣你開聲搵人幫你手做你唔識做既野唔使死架!?你懶係show off但又攞架來掉唔係問題~~~但你咁樣waste左我成半日望住你「7」而唔可以返埋位做正經野咪大問題囉~~~~!?

7. 唔識野又扮到自己最熟D野,跟住要人跟佢指示做野

「無料當正自己係同花順」既老細令你最想「大巴大巴『煎』佢上天花」既係,佢會同你講佢係全個project既最高領導人,所有人(包括隔離做一齊夾份做野既人甚至係clients,全部職級俾佢大或同佢同級)唔係同佢協作而係配合佢去做野,而佢口中既「配合」即係人地冇say只能跟佢orders去做野,不過實情係,佢係乜都唔識又扮到識哂、D野搞到亂哂要隔離幾組有份搞project的人同佢「執屎」執到燥底想死。而你呢位小薯因為能力有限未能出手相助,而只能旁觀同必要時同隔離組既人一齊互呻「領你老細野的辛酸」。

面對呢D老細,不禁令人想「小」佢︰阿「最高領導人」呀,你「7」少陣啦唔該~~~~!?你一味「77貢」亂咁老點人人都頂你唔X順配合唔X到架~~~~!?不如掉番轉你條木咀「7」友配合下其他搞project既大伙人「7」少陣仲好啦~~~~!?

8. 其他人婉轉指出佢做錯野就話其他人唔配合佢

「無料當正自己係同花順」既老細最唔鐘意人地話佢錯,事關佢覺得自己從來都啱X哂而人地錯X哂。當其他人(包括你同其他同事)都指出佢有錯,佢就會話你唔配合佢而之後下下針對指出過佢有錯既人。直到佢錯到其他高層同佢上面D高層講,搞到要佢上面D高層每個會議都列席食住佢兼阻佢再做錯野,至暫時忍得住佢果股「亂X咁做」既氣勢。

面對呢D老細,不禁令人想「小」佢︰你冇X野呀~~~~!?你錯左人地好心提你反而係人地錯兼唔配合你~~~~!?咁你冇錯囉~~~~!?你「冇錯」到你上面D高層都驚你錯到兜唔番要「配合」下你下下列席會議囉~~~~!?

9. 交帶親D野永遠有N個不同說法,永遠冇一個係正確說法

「無料當正自己係同花順」既老細最出神入化既地方係,佢交帶親俾你同隔離幾組的工作永遠有N個不同的說法,但永遠冇一個係正確說法,仲要係9唔搭8的說法,令你同其他幾組既人都聽到「1999」、向佢「抱緊中指」,而你同其他幾組人為求自保不被你老細「一命玩謝全家」只能想辦法請求其他同事問下你老細D野可以點拆得掂。

面對呢D老細,不禁令人想「小」佢︰你冇X野呀~~~~!?你邊個外星球來架~~~~!?你究竟知唔知自己講緊乜X野呀~~~~!?交帶D野下下9唔搭8咁,你係搭錯線定痴X左線呀~~~~!?

10. 叫你在工作上乜人都唔好信只係信佢,但其實佢係最信唔過既人

「無料當正自己係同花順」既老細最令你作嘔既係,要你當佢係神或偶像咁去敬拜!?佢會同你講在工作上乜人都唔好信,vendor做既野講既野唔好信、clients做既野講既野唔好信、其他同事做既野講既野都唔好信,只係信佢然後信自己,下下乜都人地做完講完自己又做多次。但實情係,佢係最信唔過既人,兼且久唔久就「老點」你同「跌你幾鑊甘」~~~~!?而唔想下下俾佢「老點」就只能在你百份百知道係你冇錯時閘住佢既亂X咁入功勢去糾正佢既錯誤,令佢敢怒而不能發作。

面對呢D老細,不禁令人想「小」佢︰老細~~~~!?你係神,不過係「神化」果個「神」囉~~~~!?你諗住我要當你偶像?我對「偶像」既要求好高架喎,唔使靚仔唔使型格但要做野係「真材實料有料到」既實幹型喎,真係sor9ry 呀,exact7ly你一D都唔X係「真材實料有料到」既實幹型呀,你只係「無料當正自己係同花順」既「搏『小』搏『7』」型咋~~~~!?你慳DD啦~~~~!?阿「偶像」~~~~!?

日日面對住「無料當正自己係同花順」既老細,你好想走但又暫時走唔到,除左日日同身同感受既同事及知你老細有幾「7」既同事呻下,都冇乜野可以做,始終連高層們知佢唔掂但佢未犯大過錯都未能向佢開刀,更何況你你呢個under佢既小薯哩!

雖然唔知大家既老細,中左幾上邊幾樣,定係勁到以上樣樣中哂,若果樣樣都中哂既話,真係除左「恭喜」你之外唔知講乜好了。而小編都要不忘「恭喜」下自己每日都「心中粗口千萬串」,因為小編既老細好「榮幸」咁中~~~~L~~~哂~~~~!?

唉~~~~冇乜野既小編就收拾心情準備明天返工啦~~~~

讀者如喜歡這篇文章 ,可於文章最下方按下Likebutton以示鼓勵及支持(若LikeCoin用戶請先登入再按下Likebutton ,最多可按5下,而其他人士也可以了解LikeCoin及考慮是否註冊使用LikeCoin )

而加入 LikeCoin 回饋創作者計劃,更有免費獲得coin的活動:

  1. 註冊一個 LikeCoin ID (邀請人請填: tracy2018)
  2. 確認已登入 LikeCoin (確認方法)
  3. 點擊五下拍手(操作參考)
  4. 完成後,你我都會獲得免費的 LikeCoin (可用來交換以太幣或現金)

讀者在看完這篇文章以後,若有興趣也可以閱讀其他相關的分享文章︰

打工仔痛苦篇 之 老細,你玩哂啦!
打工仔痛苦篇 之 十種令你想死的工作情況

#香港 #工作 #生活 #化讚為賞 #化like為coin