香港你、我、他 之 天水圍阿珍

由於《香港你、我、他》是圍繞香港的「低俗貼地」短篇單元故事,是發生在你、我、他身邊的日常,因此內容多為港式口語及粗言穢語,敬請留意。

我叫阿珍,係一個天水圍土生土長既女仔,曾經有段時間天水圍被視為「悲情城市」,但我就覺得天水圍一D都唔「悲情」,而只是獨特既「自成一角」。

一係唔search Wikipedia,一search wikipedia有關天水圍既歷史(https://zh.wikipedia.org/zh-hk/%E5%A4%A9%E6%B0%B4%E5%9C%8D%E6%96%B0%E5%B8%82%E9%8E%AE),就發現天水圍被叫做「悲情城市」原來關現任特首林鄭月娥事︰
自2001年天水圍北部多個屋邨入伙後,區內發生左一些嚴重的家庭問題,引起社會的廣泛關注,天水圍的形象變得較為負面。2006年7月政府民政事務局常任秘書長林鄭月娥稱天水圍是個「悲情城市」,結果被傳媒批評發表太遲,落藥不夠重。

其實呢度自從開發成新市填後,除左有土生土長既香港人生活之外,仲被政府安排左好多來天水圍北部長住生活既「新香港人」 — — — 內地新移民和少數族裔;天水圍居民每日面對住生活開支大收入少既艱難,而「新香港人」仲要面對各種新環境新人事的問題,有乜理由唔生活迫人到果段時期密集式有幾單倫常慘劇呢!

呢度地方又疏又散亂,而區內D配套同設施又唔夠勁,咪搞到呢度果期下下天怒人怨咁囉!D配套同設施點唔夠勁法?

先講交通啦,即使2003年年尾有西鐵通車可以連接天水圍同市區,咁又點?若果天水圍人要到西鐵站出市區返工返學,就要先搭三幾個字至半個鐘既輕鐵去西鐵站。若果唔搭西鐵呢?一係搭三幾個字輕鐵到天水圍南部既天慈邨度搭巴士出上水再轉火車,一係搭三幾個字輕鐵到天水圍南部既天水圍市中心搭巴士到市區各處,而天水圍北部最入既天恒邨只有2條巴士線去市區。交通咁零散疏落,車費又唔少車程又轉折又遠,下下出去市區要最少個幾2個鐘至去到,仲未計要轉車喎,就算係好似隻牛咁捱得住既堅毅的天水圍人,都會慢慢積聚怨氣啦!

再講生活設施啦,係就係呢度天水圍有唔少商場,但呢D商場近年俾領展接收左之後係咁裝修,裝修完D舖頭大多係賣貴野既連鎖式商店,唔少本土小店都因為被迫裝修同租金大加價之下捱唔到幾耐就摺左關門大吉,望住D係得貴野賣既商場,真係叫天水圍人點買得落手呢?再講休閒設施,呢度連區內最特色既濕地公園同天秀墟都冇乜太大特色去吸引人去參觀消費,而其他休閒公園如天水圍公園則除左老人家散步晨運及外傭假日去Gathering外就冇乜吸引力既地方,區內真係冇乜特色D既地方可以帶小朋友去放下電又俾自己放下負能量,D負能量積積埋埋,積到一個點咪就爆發出事囉!

可惜既係,政府除左之前「悲情城市」個名響遍全港果陣搞過少少招聘天水圍人既活動之外,好似真係唔多覺有搞過其他野幫到天水圍人。所以天水圍人仲可以點?咪只能盡量自己諗計睇下點用自己既方法生存落去囉!

返工返學車費貴咩?咪日日5點幾6點晨運咁早起身出門迫港鐵出市區用早晨75折優惠囉!又或者買月票搭巴士港鐵囉!

區內買餸貴咩? 咪跨區去元朗屯門街市度買餸囉,仲要一買就買夠幾日既餸,鬼咩!?呢D地方仲未歸領展管,價錢夠貼地仲勉強應付到嘛,買夠幾日咪慳番少少跨區買餸既車錢囉!

買野置裝貴咩?咪上網淘寶囉,粗粗地用嘛!再唔係咪買少D衫褲鞋襪囉!

平時出去玩交通費貴咩?去天盛苑同天耀邨果邊行又俾「進佔」既冇品叫囂水貨客阻路咩?咪盡量留在家中做宅男宅女唔約人出街囉!最多咪去樓下公園行下呆下,或去附近商場涼下冷氣囉。

學生哥學生妹冇錢去補習同興趣班?咪捉住學校老師係咁問囉!咪去圖書館借書睇囉!或上網自學有興趣既野囉!再唔係咪試下無師自通囉!

總之,除左必要性開支外其他野一律cut得咪cut囉,感覺好似破產人士咁生存。冇錯!連生存都好困難既時候係冇得諗點樣好好生活既,住得天水圍呢度既人,大部份都窮到好似破產咁架啦,咪又係一路係咁慳下忍下咁生存到而家囉!

呢度既所有野同以前俾人叫「悲情城市」果陣其實冇乜特別唔同,新移民同少數族裔既問題(童黨、綜緩戶、少數族裔生活文化差異等)依然一直存在,唯一唔同既只係呢度捱過「悲情城市」時期後再冇密集式咁有倫常慘案。呢度既人不論大人細路每日都係同以前一樣係靠住比其他新界西人更堅忍更有毅力既精神去一小步一小步咁行出自己既路去生存!

讀者如喜歡這篇文章 ,可於文章最下方按下Likebutton以示鼓勵及支持(若LikeCoin用戶請先登入再按下Likebutton ,最多可按5下,而其他人士也可以了解LikeCoin及考慮是否註冊使用LikeCoin )

而加入 LikeCoin 回饋創作者計劃,更有免費獲得coin的活動:

  1. 註冊一個 LikeCoin ID (邀請人請填: tracy2018)
  2. 確認已登入 LikeCoin (確認方法)
  3. 點擊五下拍手(操作參考)
  4. 完成後,你我都會獲得免費的 LikeCoin (可用來交換以太幣或現金)

讀者在看完這篇文章以後,若有興趣也可以閱讀其他相關的分享文章︰

香港你、我、他 — 單元一 東涌歡喜哥的怒喊

#香港 #社會 #生活 #化讚為賞 #化like為coin


slienceblack

https://medium.com/@slienceblack

一個"吹水"大師 一個在不同方面有好多理論, 極之討厭唯利是圖的人