日本某年紅葉之旅 第一天

某年11月13日 星期三

同之前去旅行一樣, 前一晚飛去日本, 又係我家那位老太送我去車站等機場巴士, 真係好 ~~~ 不過我係唔會唱”世上只有媽媽好, 有媽的孩子像個寶”咁「娘」的 ~~~ 😛

之後十點幾到機場, 打番屋企報平安之後, 就慢慢搵位坐低等check-in然後再等上機, 中間某巴打 whatsapp搵我吹水, 同佢whatsapp左一陣 ~~~

半夜1點幾上機, 全程吊住魚咁fall asleep, 然後日本時間11月13日五點幾六點到左日本, 一到埗即到果邊既JR Green Counter換哂d JR Pass同JR關西Wide Pass, 之後開始18日既行程lu ~~~~ XDXD

因為之前在機上只係吊住魚咁訓覺, 所以唔想太chur, 所以去左hostel放行李先, hostel有得寄放行李好緊要, 因為日本係一律下午十二點後甚至兩三點至有得checkin, 唔係個個都想第一日落機就要的住一抽二lung既野去周圍行, 又唔想俾錢用coin locker嘛 ~~~ XDXD

不論我去過幾多次日本都好, 次次第一轉去hostel都總會在開始階段蕩失路, 就算有地圖都好, 今次都唔例外, 我搭JR去到hostel果區, 找左大半個鐘, 至找到間hostel, 一抽二lung咁搵路好狼狽, 放低行李之後就在hostel附近認路了, 認完路之後發覺其實間hostel都唔係太惡搵, 於是就去是日旅行第一站了

第一站 — 奈良公園

本身上網睇過話呢度開始有紅葉, 於是就諗住過來睇下先, 點知, 行左成個奈良公園, 由十點幾行到三點幾, 都只係見到幾棵樹有紅葉, 唉…..不過都好過一d紅葉都冇既~~~~ 中間仲去左春日大社兼又做左傻仔買左個繪馬寫祝家中老太身體健康, 我每次去春日大社都做的~~~果度又例牌見到好多鹿, 又係成大班鹿圍住同追住d人搵食, 我呢d怕俾佢地追同撞既”笠水之人”, 當然係閃人啦, 全程都ok ge, 只係中途行行下突然落雨, 搞到我要搵地方著雨衣 (果度既遮太弱雞了, 落親雨大風少少都會吹爛, 所以我果日冇買到, 不過後來都先後買左遮)

行完公園就去奈良商店街lunch, 因為有唔少食店唔係摺左就係價錢唔抵, 最後去左一間中國料理店度食野

之後行去JR奈良站, 果陣JR站上空已經一大片灰雲了 (其實果日個天都陰陰地…), 之後就去第二站了

第二站 — 通天閣

每次去大阪都總會去兩度地方睇夜景或日景, 一個係通天閣, 一個係梅天city, 因為通天閣相對比較近我hostel, 所以就去左呢度了

去到果陣只係五點幾, 唔想太早上去, 於是去左通天閣下面最出面既串燒店度dinner, dinner完六點幾天都黑齊就上去通天閣睇夜景 (其實在日本, 每日當地時間五點就已經開始天黑或已經天都黑齊架la~~~ XDXD)

由於唔係weekend, 所以唔係好多人, 唔使同人迫下迫下至去到窗口位睇夜景 XDXD, 果度既夜景都唔錯架, 中間仲俾我見到附近既動物園已經著左Xmas燈飾tim, 不過我對動物園冇興趣 😛

我好鐘意在日本高空睇夜景, 因為由高空望落去會見到好多燈 (唔係睇壞眼既廣告牌果d燈, 係街燈同人地屋企d燈), 閃下閃下, 好似見到好多唔同顏色既星星咁, “萬家燈火”, feeling good ~~~

睇完之後就返hostel休息了, 之前網上睇到話間hostel老闆係台灣人, 點知去到見到個hostel keeper係日本女人兼唔識英文同普通話, 都有點down, 點知~~~原來晚上當值既hostel keeper真係台灣人來架~~~仲要話我既普通話佢聽得明講得ok, 好過好多佢見過既HK住客呀~~~真係開心到呢~~~~最重要係間hostel有lift, 有lift對拖gip去旅行既人好重要架~~~~!

返到房之後就打回家同家中老太報平安 (其實果日一落機已打過番去報平安了), 跟住就去shared bathroom 沖涼流洗了, 所謂shared bathroom, 就係平價hostel入面每層都有既公共bathroom, 每次只能1個人入去沖涼, 有齊沖涼梘液, 洗頭水同護髮素, 仲有風筒吹頭的~~~, 其實間hostel本身係有免費入場劵去附近既澡堂度浸下小溫泉的, 但因為太tired了, 第二日至開始日日攞 XDXD

沖完涼返房用電腦上一陣上網之後就訓覺了, 明天再出發 XDXD

讀者如喜歡這篇文章 ,可於文章最下方按下Likebutton以示鼓勵及支持(若LikeCoin用戶請先登入再按下Likebutton ,最多可按5下,而其他人士也可以了解LikeCoin及考慮是否註冊使用LikeCoin )

而加入 LikeCoin 回饋創作者計劃,更有免費獲得coin的活動:

  1. 註冊一個 LikeCoin ID (邀請人請填: tracy2018)
  2. 確認已登入 LikeCoin (確認方法)
  3. 點擊五下拍手(操作參考)
  4. 完成後,你我都會獲得免費的 LikeCoin (可用來交換以太幣或現金)

讀者在看完這篇文章以後,若有興趣也可以閱讀其他相關的分享文章︰

日本某年紅葉之旅 前傳

#日本 #旅遊 #遊記 #Travel #化讚為賞 #化like為coin


slienceblack

https://medium.com/@slienceblack

一個"吹水"大師 一個在不同方面有好多理論, 極之討厭唯利是圖的人