前一日幾乎全日在嵐山渡過, 而呢一日就周圍去幾度地方了

唔講唔知, “黃金周”並不是”強國人”的專利, 在日本都有”黃金周”, 不過日本既”黃金周”比較特別, 特別在佢夠”ka la”, 先放四月廿八至三十日, 之後五月一至二日要返工, 然後再放五月三至五日, so前一日同呢一日在車站搭車都超多人,尤其是好多清一式”黑老西” (著黑色西裝外套的男白領)同清一式在車上坐低化”行”庄的OL, 在車站同車廂人迫人既程度, 你會覺得身處平時繁忙時間既香港車廂咁

呢一日, 唔知點解, 突然好早就起身, 醒果陣只係當地時間六點幾, 跟住我就好慢條絲理咁梳洗出發去京都銀閣寺了, 經過前兩日在京都車站搭車的經驗, 我去到京都站已好快咁找到我需要搭車既車站了, 之後就一路坐到銀閣寺落車

其實呢幾日真係乜都唔使諗只係日日粗略plan下一日想去邊度再到時自己執生 re-schedule, 真係好enjoy, 如果佢唔係日日落雨, 我會更enjoy, 去日本果六七日, 除左到達同離開日本果兩日之外, 日日都落雨, 落雨都唔重要, 仲要勁大風咁”pit”雨果下至”攞景”嘛 ~~~ > <

呢一日都係一樣, 我一起身已經係落緊雨了, 但冇計, 電波旅行就係要風雨不改嘛, 到左銀閣寺, 發現其實銀閣寺相對其他京都寺廟真係”小兒科”, 冇乜野睇, 唯一可取之處係在銀閣寺的山邊小徑上可以遠望京都市, 好快就行完左銀閣寺走去第二度了

可能因為日本人返五月一至二日又放假啦, 前一日同呢一日都見到唔少中小學生搞學校旅行, 由銀閣寺走返去車站一路都見到, 之後見有路行”哲學之道”, 就諗住睇下何謂”哲學之道”了一路行其實越來越覺得冇櫻花開既”哲學之道”其實真係好深奧, 佢深奧在我唔知佢”哲學”在邊一度, 一路行我亦唔知在”哲學之道”入面行左幾遠, 全程又冇乜人行, 之後, 由於冇櫻花下的哲學之道實在哲學得滯, 唔係我呢個凡夫俗子可以理解, 最後我在哲學修左一半就修完去第二度了 😛

之後搭車返京都站中途見到一個巨型既紅色鳥居, 俾佢attract 左下車去平安神社行下, 間神社”紅當當”咁幾有特色架, 入面係好空曠既沙地同寺廟, 但我只係行左一陣就走了, 因為冇乜野好睇 😛

之後轉去行清水寺, 對於呢個寺廟, 我只可以用”鬼斧神工”來形容, 真係好古僕同好宏偉, 我個人覺得佢直情係”京都寺廟之最”, 不論係寺廟建築定係在寺廟眺望既京都景觀都係好正的 ~~~ ! 清水寺亦係我在京都留得最耐的寺廟, 下次有機會都會再去過 ^^ 在清水寺草草食完幾個飽仔做lunch就繼續搭車向京都站出發了

之後見順路, 就中途去埋三十三間堂, 三十三間堂我冇記錯佢係因為係一間有三十三間房既寺廟而聞名的, 唔知係咪三十三間個勢太勁, 加上強風細雨, 我果把跟左我好耐既”城大短遮”, 在三十三間堂門前”壽終正寢”了 =.=, 由行三十三間堂到行完三十三間堂之後都要一路”dup”住雨一路行去車站等車去京都站 =.=, 三十三間堂其實都係一個唔錯既寺廟, 不過對我的吸引力唔大 😛

之前聽朋友講, 奈良途左奈良公園外冇乜野好行, so大約半日就行完, 咁我見返到京都站都只係三點幾, 時間尚早, 就即刻搭車去奈良了, 點知好死唔死, 坐左最快既”特急”車之餘我仲要唔知我手上既”關西三日遊”坐呢d車唔同坐其他車咁唔使錢, 當我上去冇耐俾個大嬸用日文話我坐左佢個位果下, 我就已經知道上錯車, 但我唔想轉車 (因為其他去奈良既車最快下一班車好似要成半粒鐘之後才到京都車站), 於是諗住”博大霧”啦, 點知唔知係果位大嬸報串, 其他人報串, 定係本身就有人會巡查車票, 我就係因為咁, 在架車去左一半路程時俾人”周到”, 好瘀…=.=, 最後俾左五百yen巡查員買臨時票 =.=

[諗住”博大霧”呢家野大家千祈唔好學, 因為在日本咁樣做諗住側側膊唔多覺係唔啱架, 我後生果陣唔生性過呢一次之後亦再冇做過呢D衰野了…=.=]

去到奈良, d雨細到唔使擔遮, 但我都係九秒九行去用五百yen買左把大遮等之後有得用, 日本果幾日陰晴不定嘛, 買定備用安全d, 之後一路行公園, 都見到好多鹿, 仲要見到佢地俾人餵完一次之後係咁跟住果個人唔放, 仲要咬穿人地個袋, 搞到我本身對佢地冇乜野既都變左要”敬而遠之” :P, 不過都俾D鹿迎面嚇左兩次, 好彩佢地都算馴良, 只係在我面前企定定唔郁一陣之後行開唔理我 😛

在奈良公園入面行左東大寺同春日大社, 在春日大社入面見到好多許願木牌俾人許願長壽, 我諗春日大社應該係管長壽既寺廟了, 於是我都趁熱鬧咁用左200yen買左個木牌為家人許願了, 我稱呼呢d木牌叫”傻仔牌”, 因為掛上去冇耐就會俾果度既工作人員”除牌”架 la, 但依然仲有好多傻仔, ofcoz包括左我啦, 會照許願既, 就係因為果日冇為自己許願長壽健康, 搞到而家病鬼左俾老朋友”死氣喉”（氣管敏感）來探我了 ~~~ > ~ <

之後已經feel到對腳行到用”勁痛”來向我投訴, 放是我就春日大社慢慢咁行去奈良車站了, 中途經過五重塔, 又係冇乜野好睇, 睇左一陣就繼續走去奈良車站行步行街兼dinner就返民宿旅館了, 果陣又係好早咁唔知七點幾定八點幾返到去, 於是又有得借PC上FB同check email XDXD

讀者在看完這篇文章以後，若有興趣也可以閱讀其他相關的分享文章︰

黑色沉默香港仔遊記系列 某年日本之旅前傳

日本電波之旅 — — 第一日 — 某年4月29日

日本電波之旅 — — 第二日 — — 某年4月30日

日本電波之旅 — — 第三日 — — 某年五月一日

#日本 #旅遊 #遊記 #Travel #化讚為賞 #化like為coin